Getxoko hamaika eragile eta herritar: "Amnistiaren bidean euskal presoak Euskal Herrira eskubide guztien jabe!"

Gaur hemen bildu gara Getxoko kirolari, euskaltzale, bertsolari, mendizale, txalapartari, Gazte Asanbladako kide eta herritarrak orokorrean, 2010eko azken ostiraleko mobilizaziorako deialdi berezia egiteko. Datorren abenduaren 31n arratsaldeko zortzietan Telletxe plazan egingo den elkarretaratzearekin bat egitea eskatzen dizuegu Getxoko auzokide guztioi. Horretarako 22 arrazoi ditugu herri honetan. 22 dira Frantziako zein Espainiako espetxeetan gatibu dauden getxoztarrak: futbolariak, irakasleak, bertsolariak, aita, arraunlariak, semeak, surflaria... bizilagunak. Herriaren zati diren 22 lagun hauek eta euren senide eta lagunek espetxe politika bidebakoaren ondorioak pairatzen dituzte egunero: etxetik milaka kilometrora egotea, osasun baldintza txarrak, hurbilekoak ikusteko debekua, ikasteko trabak, tortura, eta abar. Argazkian, abenduaren 17an egin zuten agerraldia (mp3) Algortan.

Hona adibideak:

- Anjel Figeroa. Etxean preso, gaixotasun larria duen arren.
- Jon Rosales, Gabi Basañez eta Imanol eta Iker Beristain. Epaiketa izan barik espetxean.
- Gorka Garcia Sertutxa. Epaiaren 3/4ak beteta kartzela-zuloan.
- Iker Beristain. 25 eguneko gose greba egin behar izan du bere alaba ikusi ahal izateko.
- Urtzi Paul Larrea. Itxialdiak egiten dago momentu honetan, isolamendu moduluan sartu baitute.

Puntu horietan guztietan eskubideei buruz hitz egiten ari gara, edozein presok Estatu Espainol eta Frantsesean bermatuak dituen eskubideak dira. Zergatik gure 22 lagun hauek ez dituzte? Zergatik 750 euskal preso politikoek ezta ere?

Prozesu demokratikoan murgilduta, aldaketaren bidean. ETAk su etena iragarri du eta Eusko Alkartasuna, ezker abertzalea eta beste zenbait eragile politikok konponbiderako proposamena jarri dute mahai gainean. Herriak bidea eraikitzeko nahia erakutsi du. Baina Espainia eta Frantziako Gobernuek ez dute inolako pausurik eman; ez dugu ezelango aldaketarik igarri jarrera errepresiboan.

Auzokideei elkartasuna adierazteko zein espetxe politika bidebakoa salatzeko, urteko azken barikuan Algortako Telletxen egiten den elkarretaratzera hurreratzea eskatu gura dizuegu.

Amnistiaren bidean euskal presoak Euskal Herrira eskubide guztiek jabe!

Sinatzaileak:

- Bilgune Feminista.
- Algortako Gazte Asanblada.
- Txorimalo gaztetxea.
- Bizarra Lepoan euskara elkartea.
- Eztabaida Gunea.
- Ukberri.net agerkari digitala.
- UKTEST.
- Ungari mendi taldea.
- Gorrondatxe kultur elkartea.
- Itsasoruntz.
- Getxoko futbolari, errugbilari, igerilari eta herri-kirolari batzuk.
- Getxoko dantzariak.
- Koska irratia.
- Ezker abertzalea.
- Beste hainbat eragile eta herritar.

Auto-istripua izan dute Iñaki Gonzalo presoa bisitatzetik zetozen lagun bik

Larunbatean, Iñaki Gonzalo Casal "Kitxu" Itzubaltzeta / Romoko euskal preso politikoa Villanublako espetxean bisitatu eta etxerako bidean zetozela, istripu larria izan zuten Algortako lagun bik Valladoliden bertan, Uribe Kostako Amnistiaren Aldeko Mugimenduak Etengabe bitakoraren bitartez jakinarazi duenez. "Lagun biek kolpe ugari hartu zituzten eta autoa desegiteko gelditu da. Ospitalean izan ondoren, lepoko bana jarri dizkiete eta tratamenduan dira minak arintzeko. Dagoeneko biak etxean daude", azaldu du errepresioaren kontrako erakundeak. Istripua eguerdian gertatu zen, beste auto bat aurreratzeko maniobran frenatu eta kotxeak zibarena egin ostean, irauli eta errepidetik kanpora joan zenean. "Istripua oso fuertea izan zen eta pozik esan ahal dute onik atera zirela", amaitu du Uribe Kostako AAMk. Argazkian, auzotar bat Iñaki Gonzaloren irudia eskuetan.

Arkaitz Estiballesek jantzi du Bizkaiko txapela

Arkaitz Estiballes nagusitu da Bizkaiko Bertsolari Txapelketako finalean. Barakaldoko BECeko aretoa 4.200 bertsozalek betetzen zutela, giro ezin hobean ospatu da Bizkaiko bertsolaritzaren festa. Etxahun Lekuerekin batera heldu da buruz-burukora Estiballes eta 947 punturekin suertatu da irabazle. Berak osatu du finaleko bertsorik borobilena, 52 puntuz: bakarka, gaia emanda, doinu eta neurri librean botatakoa, alegia. Aita Luis Baraiazarrak jantzi dio txapela eta, gakakoztarrak, Ondarroari eskaini dio aurretik jasotako aginte makila, “intsumisioari baketsu lotutako herria” izateagatik. Bitartean, Jone Uria Albizuri seigarren egin du, 483 puntu erdietsiz. Alcalan preso daukaten bere herrikide eta bertso eskolako lagun Gabi Basañezi aurten Algortako Olentzero izatea opatu dio Uriak. Fredi Payari, berriz, emandako aholkuak eskertu dizkio. Argazkian, gainontzeko finalistak txapeldunarekin batera oholtzan.

Honela geratu da azken sailkapena:

1. Arkaitz Estiballes: 947 puntu.
2. Etxahun Lekue: 889,5 puntu.
3. Miren Amuriza: 498 puntu.
4. Onintza Enbeita: 493,5 puntu.
5. Beñat Ugartetxea: 492,5 puntu.
6. Jone Uria Albizuri: 483 puntu.
7. Peio Ormazabal: 445 puntu.
8. Eneko Abasolo "Abarkas": 438,5 puntu.

Mahe Drysdale

KAE1 Ligako Gipuzkoako traineru onenaren saria jaso du Donostiarrak

Joan den denboraldian KAE1 Ligako Gipuzkoako trainerurik onena izan zen Donostiarra.
Hori dela eta, Gipuzkoako Arraun Federazioak Donostiarra-Kaiarriba Arraun Elkarteari bere lana saritzeko bandera bat eman dio. Atzo jaso zuten bandera arduradunek, Anoetako Kirol Etxean. Zerbait sinbolikoa izan arren, Elkarteak pasa den denboraldian egindako lanaren saria dela azpimarratu du. Gainera, arraunlariei denboraldi berriari begira indarra emango diela uste dute.

Argalaren murala ezabatu dute Grosen

Atzo ezabatu zuten murala udal langileek, Kortxoenea Gaztetxean aurkitzen zen.
Atzo, Abenduak 14, udal langileek Groseko Kortxoenea gaztetxean zegoen
Argalaren murala ezabatu zuten.

Ez da horrelako eraso bat jasaten dugun aurreneko aldia. Pasa den astean
ondoan zegoen Lucio Urtubia anarkista ezagunaren murala apurtu zuten
gauez, nahiz eta eraso hori uniformedun inkontrolatek egin zuten susmo
argiak ditugun, ez baitira arraroak gauetan egiten dizkiguten bixitak.

Baina azken gertakari hau bereziki larria da, hasteko udal langileak
direlako ezabaketa egin dutenak, ezabatu duten murala pareta "pribatu"
batean zegoen, eta hori ez da udal langileen konpetentzia. Jarraitzeko,
biktimak hitza guztien ahotan dagoen garai hauetan, BVE-ek eraildako
pertsona baten murala da ezabatu dutena. Beti bezela Euskal Herriak bizi
duen gatazka honetan "biktimak" soilik alde batetakoak dira.

Argi utzi nahi dugu alperrik dabiltzala beraien mezu ofizialetik dagoen
oro ezkutatu nahiean, ezabatzen diguten mural bakoitzaren gainean beste
bat egingo dugulako. Komunikabideek erakusten diguten “egi” ofizialaz
gain, ezkutatu nahi duten beste errealitate bat ere badela erakutsiko
dugu. Jai daukate gure memoria kolektiboa ezabatu nahiean, oso ondo
ezagutzen baitugu herri txiki honen historia, eta ez dugu sekula ahaztuko,
gatazka honetan alde guztietan izan direla hildakoak, baita historia
ofiziala idatzi ez dutenen aldean ere.

Euskal preso politikoek eta hauen senideek elkartasun keinua jaso dute Irlandatik

"Zuekin gaude" dioen pankartaren atzean batu dira Irlandako Doire konterriko Machaire Rátha-ko hainbat gaeliko irakasle, laguntzaile eta gurasoak.
Iralandako Doire konterriko Machaire Rátha-ko hainbat gaeliko irakasle, laguntzaile eta gurasoek manifestaldira joateko deia egin eta "zuekin gaudela" esan diete euskal preso politikoei eta euren senideei